Almennar upplýsingar til foreldra og forráðamanna vegna COVID-19

Efni: Almennar upplýsingar varðandi COVID-19 og starfsemi leik- og grunnskóla.

Í ljósi þess að nú hefur neyðarstigi almannavarna verið lýst yfir vegna COVID-19 kórónaveirunnar áréttar almannavarnadeild ríkislögreglustjóra og þar með Mosfellsbær mikilvægi þess að allir fylgi leiðbeiningum sóttvarnarlæknis. Nýjustu upplýsingar eru ávallt að finna á vef Landlæknisembættisins: www.landlaeknir.is

Leik- og grunnskólar í Mosfellsbæ starfa samkvæmt fyrirfram skilgreindri viðbragðsáætlun og er brugðist við í takti við fyrirmæli almannavarna og Landlæknis.

Ef upp kemur grunur um smit hjá barni eða starfsmanni í skóla fer viðkomandi í sóttkví í samráði við heilsugæslu/heilbrigðisyfirvöld til að gæta fyllsta öryggis og varúðar. Sé viðkomandi einkennalaus og ef einkenni koma ekki fram er sóttkví aflétt í samráði við heilsugæsluna/heilbrigðisyfirvöld.

Ef upp kemur staðfest smit er viðkomandi barni eða starfsmanni gert að fara í einangrun í heimahúsi og fylgja fyrirmælum heilsugæslu/heilbrigðisyfirvalda.

Almennar upplýsingar og ráð

Eins og fram kom í pósti sem sendur var til allra foreldra/forráðamanna barna í leik- og grunnskólum Mosfellsbæjar í byrjun mars þá eru foreldrar beðnir um að fylgjast vel með nýjustu upplýsingum og fyrirmælum á vef Landlæknisembættisins, www.landlaeknir.is

Ef börn eða fjölskyldur þeirra ferðast um skilgreind hættusvæði, þurfa þau fara í sóttkví skv. leiðbeiningum Landlæknis. Í sama bréfi var foreldrum barna með skert ónæmiskerfi eða undirliggjandi öndunarfærasjúkdóma ráðlagt af heilbrigðisyfirvöldum að ráðfæra sig við viðkomandi sérfræðing eða heimilislækni.

Samhliða var biðlað til allra þeirra sem finna fyrir einkennum og hafa mögulega verið útsettir fyrir smiti til dæmis vegna ferðalaga að hringja í síma 1700 og fá leiðbeiningar frá Heilsugæslunni.

Að öðru leyti þá eru grunnskilaboðin þessi: Þvoum okkur um hendurnar, hættum að heilsast með handbandi, hlustum á ráð sérfræðingana, tökum hlutunum með ró og förum eftir leiðbeiningum um hreinlæti og breytta hegðun.

Með góðri kveðju

Fræðslu- og frístundasvið Mosfellsbæjar